UMBIKO: Inhlawulo ezibhedlela zeZimbabwe isikhuphukile.
UVELA NGAPHI: Umbiko omemetheka ku WhatsApp.
ISINQUMO: Ngamanga
Umbiko omemetheke kuWhatsApp kumalanga asanda kudlula uthi inhlawulo yezibhedlela zeZimbabwe isikhuphukile.
Lumbiko uthi isimemezelo lesi senziwa ngunobhala omkhulu (permanent secretary) kugatsha lwezempilakahle lokunakekelwa kwabantwana, uDr Agnes Mahomva.
‘Esibhedlela seParirenyatwa, abadala sebezahlawula amadoda angamakhulu amabili ($200) kuthi abantwana abaleminyaka engaphansi kwemihlanu (5) bahlawule ikhulu lamadola ($100) kuzindlu zikawonke (General ward). Ezibhedlela zeCentral imbadalo likhulu lamatshumi ayisithupha amadola ($160) ebadaleni lamatshumi ayisitshiyagalombili ($80) ebantwaneni. Kuzibhedlela zezifundazwe (Provincial hospitals) ngamadola alikhulu lamatshumi amabili ($120) lamatshumi ayisithupha ($60). Kuzibhedlela zezabelo kuzakhokhwa amadola ayisitshiyagalombili ($80) ebadaleni lamatshumi amane ($40) ebantwaneni,’ kutsho lumbiko.
Uyaqhubeka lumbiko usipha indleko ezitshiyeneyo kulezizibhedlela.
Okuyikho
Umlobi wombiko lo uthi uDr Mahomva nguye owethule isixwayiso lesi njengonobhala omkhulu kugatsha. Lokhu ngamanga. UMahomva waphatha lesisikhundla kusukela kumnyaka ka2018 kusiya ku2020. Osephethe lesisikhundla okwakhathesi ngu Dr Aspect Maunganidze.
Umbiko lo osumemetheka kuWhatsApp ngumbiko wakudala ngo2020. Ngesikhathi sakhona wamemetheka kundawo ezitshiyeneyo ebulenjini kanye lakumaphephandaba lapha lalapha.
Eqinisweni, imbadalo ezibhedlela zeZimbabwe ayiguqukanga. Ilokhu iyiyo eyamenyezelwa ngoNhlangula ka2022. Abadala bahlawula amadola eMelika alitshumi lambili (US$12) kuthi abantwana bahlawule amadola ayisithupha (US$6).
Isinqumo
Umbiko othi inhlawulo yezibhedlela ikhuphukile kweleZimbabwe ungamanga. Umbiko lo omemethekayo ngowesimemezelo sakudala ngo Zibandlela ka2020. Ngesikhathi leso, imbadalo yayibekwe ngamadola akuleli kukanti inhlawulo esikhona okwamanje ngeyamadola eMelika. Imbadalo ehlawulwa ezibhedlela okwakhathesi ngamadola alitshumi lambili eMelika (US$12) ebadaleni lamadola ayisithupha (US$6) ebantwaneni.
